2008立法會投票

星期日去了投票。現在選舉已過,光明正大講出自己投票意向沒有問題吧?

我住新界東,有九張名單選七個議席
1. 民主黨的鄭家富,
2. 民主黨黃成智;
3. 公民黨的湯家驊,
4. 前線的劉慧卿;
5. 建制派民建聯劉江華,新丁陳克勤
6. 社民聯梁國雄
7. 自由黨田北俊,
8. 獨立人仕龐愛蘭
9. 獨立人仕莫錦貴

我投了什麼呢?

新丁,龐愛蘭,估不到吧?

新界東的NOW電視論壇因工作關係,我只看了少少,最多看到梁國雄明串陳克勤那一幕,但其他民調就真的沒有時間去認真看,連帶他們的政綱我都無留心看,但,個個黨都話自己支持普選,照顧基層中產,仲之乜野人都會幫,無乜差異,不看也罷,憑印像投票吧。

民建聯即是沒有那個論壇出現我都不會投,民建聯的地區工作我其實十分欣賞,可能因為阿爺有錢,乜鬼旅行,特價醫療,樣樣活動都有搞,,不過去到議會層面,我就不喜歡劉江華,覺得佢有時在議會太婆媽,議題太過細眉細眼;陳克勤太細啦,連人地點RUN都未必知,做多幾年地區工作先啦。

民主黨也絕對不投,因為我對這個黨徹底失望,地區工作其實在沙田區真係唔多覺有,去到議會層了,競選議題講來講去都係普選,23條,但一樣都爭取唔到,左賴右賴,仲要玩埋內訌,唔掂;講民生了,唔係要政府減乜費物費,就係要政府大開水喉救濟,嘩!錢從何來的?咪又係我那些有份俾薪俸稅的人仕,投去咪即係找我笨?只懂慷他人之慨,更唔掂。

前線是民主黨的昇級版,是更糟糕那一隻,講就無敵,做就更有心無力,訓街就或者得,所以,唔投;

公民黨都唔知佢想點,話想幫中產,但又學民主黨,民建聯一樣想幫基層..咪講笑啦,個個都幫,即是個個都幫唔到,這叫「天真」。舉個例子,基層要工作,要麵包,基層話要搞最低工資,但好多中產都係老細喎,佢有無GUTS話幫定邊邊先?這是一個兩難...不過其實香港現在何謂中產呢?月入二萬幾收入以上?還是十幾萬月入那些?要求都好唔同..另外是總覺得公民黨太公子哥兒,和我這些基層太脫離,操多一陣先。

自由黨田北俊上次又話有七一幫助,之前曾經憧憬過自由黨會在基層,中層和上流集團中作一個較好的中間偏右的橋樑,大家有個安樂環境,但四年過去了,我除了見到樓價升了近兩成,有錢的越來越有錢,而一個公仔麵由2.5升到成3.5一個之外,我的人工卻一點都無加過,政府福利乜野都無,窮的越來越窮,只會偏坦商家卻沒有為基層做過什麼...嗯,即使俾多四年時間都無乜改善,決定唔選。

講基層,社民聯梁國雄最夠斤兩講,仲要住附近,夠哂街坊味,佢有政治智慧,夠「真」,不過我個人唔多鐘意佢的做事風格,唔選。

最後剩得兩個-龐愛蘭和莫錦貴,莫錦貴我都唔知佢乜水,點選?龐愛蘭都仲有少少專業FEEL,雖然有點左傾,不過新人事新作風,講野都有少少SENSE,無人選就選她吧。

當然我這樣選擇有點搞笑,不過選舉從來都不是「選最好」的,是要「選無咁壞」的,今次結果大家都知是我的選擇輸了選舉,不過不打緊了,反正只要香港的政黨沒有執政的一日,任何人入去最後都會變反對黨,只是程度差異罷了,重要的是我有履行了我的公民義務嘛....

     

標籤: ,

關於 小澤

呀...我咪係本網網主囉 :)