感覺完全錯哂的2009動漫節

漫畫節過了一個星期了,現在才寫會否太OUT?

漫畫節,不,應該說「漫畫散貨場」會更合適,更令人容易明白「香港」動漫畫節的本質。

我年年去,但今年覺得行得最舒服,因為無東西夠吸引,而且通道夠大又不用怎樣排隊。新聞說入場人數破了大會記錄...well  ,今年得5份3個場做SHOW,另外5份1場買老翻,5份1場場用來俾人排隊,入場人數都可以多?奇怪。

報紙說今次關於投訴老翻是歷年最多,投訴?我看算罷啦六師弟,投訴查得來展覽都完囉。

以我看來,有5份1場在賣老翻,無講錯,真係有5份1場咁多。不單止大陸來的參展商,還有「美其名的」創意工業,其實都有好多是在賣老翻,繼有小雲帽,路易士/華里奧帽外,還有很多one pieces的草帽再加死神的斬魄刀,滿街都是。

如果用人家的設計就已經叫創意,香港搞創意工業無理由無起色架?!

唔計創意地攤,今次的參展商是歷年最少,少到有5份1場「無人租」拿來排隊粗用,其實我知原本唔係咁架!

之前的中流砥柱,所有on-line game今次絕跡於動漫展之中,還有日本的動漫制作商沒有一間參與,有傳言話,係上述參展商不滿主辦單位擴大那個創意地攤云云。鬼咩,若果你是正版商,知道個場有可能一半是買老翻,仲有可能賣埋自己的老翻,同一屋簷下,一齊賣貨咪自降身價,搞CHEAP哂自己?又唔係賺得多。

反正年尾Game Show都有搞嘛,今次唔搞還有下次。

至於口靚模入侵動漫節....咪玩啦,死忠動漫迷唔多鐘意真人架!若果真係想賺那班人的錢:一係口靚模自笠ACG公仔頭cosplay埋,例如扮下澪呀,長門等的睡衣版,一係搵個有日本名的畫家,畫個2Dエロ風格製成圖片,然後出欖枕,一定好賣。現在見報見左咁多日,先得二佰幾個欖枕都叫入侵,咁銷成十幾萬書的天下又可以叫什麼?

今年的漫畫節唯獨一讚是今次請來的表演嘉賓,夠卡士,一個中川翔子都殺了,希望下年會keep住吧。

今次寫得好鬼火爆添,無計,個展覽真係越做越cheap呀嘛。年年過完個展覽後,都唔之點解會覺得動漫迷,原來係無自制能力的購物狂,但又同時可以係精打細算的炒賣天王喎;平時只鐘意2D公仔,但又唔知點解,一到漫畫節會變成見女人就會瘋狂的色情狂...既矛盾又統一,好鬼奇妙,感覺「原全錯哂」囉。

     

標籤: ,

關於 小澤

呀...我咪係本網網主囉 :)