放工準時誰不想?

老友makoto寫了一篇名為放工的文章,看後很有感觸。

由上年接手現在POST至今,年半有多,能夠準時放工的日子,除了開始頭一個月因為比較空閒可以準時放工外,其餘都是奢望收場。計算起來,超過六乘時間我是不能準時放工,當中又有八乘是無薪水的自願加班,而加班時數每次最少超過一個小時,最勁那次一日超過八小時以上。

我的工作性質,除了前線銷售外,還有新人陪訓,內部協調,宣傳和管理。幾個字,但已經夠忙。內部協調,前線銷售,只有部門間調或者前線銷售時,沒客人特別要求,我有信心控制在放工前完成,其實唔係輪到你有無信心,係人地都要放工休息,啋你都有味。而新人陪訓,內部宣傳和管理則較為棘手。

先講講管理。Report要截數後,等同事們集好,「自已又要對好了」才可以出街,其中以sales report的錯誤度最高,最花精神,尤其當同事集不集數都不會影響Sales Topline的時候,集唔集數都無問題, 這個「巨大誘因」會使同事更易來亂,亂填省時間,但自己守尾門,自己就一定要幫人執手尾,對清楚。好衰唔衰出Report的時間,又搭正放工時間..咁,有可能準時走嗎?

但這都算了,其實最花時間是內部宣傳。

唔知各位是怎樣和公司的MARKETING交手,但總覺得我公司的MARKETING是超級的麻煩,急性子,趕入產房趕生仔似的。

廣告今晚出,今日至有marketing成四點幾過來開會,佢講一個鐘,但就EMAIL成疊水蛇春咁長,密密麻麻的資料連T&C要我地自己看,然後又刨完喇,又要超短時間內,要「深入淺出咁口述 與 資料豐富並重」地,單對單或單對二咁通知哂全場八十幾九十個同事。

大佬,你估神仙咩!

但唔得都要得,個細路唔等得,穿哂羊水要生喇。於是開完會,趕快刨完資料,然後summerize好再起notes。可惜,久不久又會有同事過來問東問西,打斷工作進度,but this is my duty! ,又係我做。一個詢問五分鐘,一晚成十多二十個問題蜂擁而來,手頭上的工作進度緩慢,即使過了放工的時間,也是這樣反反覆覆,不過為了預備好明日的工作,於是無薪水都好,都要併命完成手上的大task。

有人說可以留待明日完成,但諗諗下,要起好初稿給老細先過目,預佢會修改後才可以去馬。若今日不完成,明日的大Briefing 便不能預期開始,我手停人地就乜都停,後果堪虞。

有無咁誇張呀?但Sales好衰的,要趕時間,講度「氣」,遲左就乜到無。

剛出廣告係最好生意,若自己未預備好,自己班兄弟又因為我的原故拿不到第一手資料,係呀,我現在係不用跑數呀,但班兄弟呢?個個都要開飯的!人地就賺到呵呵聲,自己兄弟就俾人問到口窒窒,無數返,雖然無影響我人工,但我一樣樣衰到死。

係,手足們無出聲,但諗到要累到班兄弟一齊俾老細照肺,實在於心不忍,唯有死都死掂去,乜鬼野都拋諸腦後了。那時,已經過十二點幾,過了我放工時間兩個小時多了。

而當那些sales plan越來越多,為了協助同事們爭取好表現,又要花時間同佢地度計。計點樣賺取最大topline,研究個plan要點樣容易去記,點樣去present最「靚仔」,沒有明文規定在duty當中,但我又覺得有價值去做,於是又花私人時間去研究,寫秘笈。

為了update最新的資料,新人陪訓那part又係花我超多時間。師傅係好緊要的,我仲記當年師傅教我,要全力以赴,我自問無佢五乘功力,但唔掂就要操到自己掂,因為這是「工作」!於是又花大量時間預備,之後背埋佢。我唔希望到我接手時,支吾以對,教壞哂班手勢,剩係個個識「渣流攤」。

「準時上班,準時放工」,誰不想?以我公司而言,我不會猜度同伴們加班,是想以超時工作來反映個人能力和表現,或者是基於個人能力不濟,我反而會傾向,因為工作多到不能完成,或者有某些urgent 工作係在放工前才收到,迫於無奈要加班。又唔之點解,各大部們係最鍾意臨放工前半個小時狂出email,隻隻都標有important的urgent task,隻隻都要follow,唔趕唔得 。

若果有一日整個辦公室的同事在放工時間後仍在拚命工作,只有自己可以準時放工,我反而會亂諗野,是否自己的importance太低,廢到無人assign task給自己呢?我希望唔會啦。

     

關於 小澤

呀...我咪係本網網主囉 :)