派case

客戶寄來的email ,若果有能夠做成生意的,通常會有其他部門分發給我們,然後,很多時都會由我,再分發給同事仔去促成生意。

平時通常派俾新人,因為佢地唔識搵客。但最近個市真係越來越難做, 於是開始多派給一些比較資深同事。佢地有時會出口要求,但有一些,開口問卻又收唔到,但見到人收到case時又變到大數時,會口出怨言,俾說話我聽,怨「點解俾佢唔俾我?」

遇著這個情況,通常都係講「你都到數啦」,或者要「跟team派呀」,或「我點知會變大客,係那位同事勁之嘛」之類,當然以上都是實情,不過,個cases點解會咁俾,俾邊個,其實個數只得我知,無人管到。咁我點解咁派呢?不瞞你,我真係睇人去派,係要我覺得你「得」才會派。

你可以話我衰,話我偏心,我會認,我最多只會有丁點兒唔開心。不過咁,唔開心我仍然會選做衰人。

我派左case咁耐,其實每派一單,我自己亦有keep record,唔係派左就算。

派case之前,我對同事們的能力已經略知一二,就著同事們的能力作出分流,避免由個唔得的去做。點樣為之得呢?其實不外乎,從同事們問我問題的方法,點樣描述個問題,問什麼問題多,之後會俾甚麼answer之類,再加上平時的performance,然後去估你善長乜,唔識乜,之後才派case。

不過唔止咁簡單。

派完俾佢啦,除非是大case,否則我唔會主動去追,但,我自己會偷偷地返check個同事係咪真係有跟,點俾offer,然後同個客deal成點,我會等,等係我唔洗追的情況下,幾時會肯主動report俾我聽。

咁仍然無解答有些人經常有case收,有些無喎?

如果我俾親你都有好消息返,仲要有交帶,我當然放心俾你做,下次都預埋你。相反有些同事能力是可以勝任的,就衰係無責任感,無持久力,嫌三嫌四。口未必有講,但暗地裡嫌case細唔跟求其close左了事,連向我交差都懶。對這些人嘛,細case都跟成舊「雞」咁,大CASE我點知你會跟成點?又我點知你點分case大細呀?我當大case,你當佢細case做,分分鐘變成missing  follow up,要我跟埋,咪搵著我來搞?咪啦,小事不忠大事不用,我先至唔會製造隻鑊俾自己,然後搞到自己呀!

這些準則,我係無同班同事講,因為,這是職場的常識,做人的基本原則,應該係要「主動」學,唔應該由我來教,你唔識大把人可以replace。

但換著是朋友就有必要講。怨上面無俾機會你,覺得自己懷材不遇的同時,其實有無撫心自問,自己對上面交帶落唻的工作,一路以來,不論大小,有盡心盡力跟足過?!你不用答我,但收得人錢,數完銀紙,就要乖乖地坐返埋位盡力做,這是職業操守,收左唔做,你唔係咁衰仔下話?!

上司係人,佢點會傻到俾一個大task,俾平時跟得可能唔係太好的同事去做?萬一真係出事,上頭問起來點解咁俾,你點解釋?答「我覺得呀」唔通?然後搞到要自己孭鑊收場?

係,係我知你回復水準係好勁,但佢鬼知你回復水準時有幾勁咩!我同你做咁多年老友都未知啦!一個平常人,賞識別人前都係看前科,唔看經驗的,那叫做「豪賭」,但有數據唔看,無啦啦又賭乜鬼野啫!唔會老襯成咁下話?更重要係,點解又要我賭係你身上呢?而唔係賭係隔離位,後生,兼樣靚身裁正,個樣有少少似周秀娜,又肯博的高材生身上?所以唔該醒下啦老友。

     

關於 小澤

呀...我咪係本網網主囉 :)