年尾review

公司每年都有個年尾review，以總結各位同事在上一年的表現如何，來年「食粥食飯」，有無「運行」一切也以這個review為標準。

好的當然有得昇職加人工，未達標的除給老細狂插外，繼續如是預定執包袱走人。

我上年的表現嘛，老實講我自己都搖頭嘆息，站在客人的立場有時是OVER-VALUE的，但公司立場來看，的確未能達到「公司的要求」，有必要接觸客戶服務的朋友有可能「感同身受」，知道是甚麼一回事了。怪的是怪自己衰，堅持行自己一套，仲未摸熟公司遊戲規則，於是工作表現猶如心電圖一樣，時高時低，波幅勁過恆生指數，一係到120%，一係就65%左右到，這樣不穩定的工作表現，你係老細會怎樣寫這位同事的REPORT呢？我真係諗唔掂。

老細說我的TECHICAL SKILL在這個部門來說是幾MATURE的，這點我幾開心，總算苦練和投資沒有白費；而且是部門中絕無僅有返工準時，當然啦，我和另一TEAMMATE是少數整年「零遲到」的人嘛，兼無乜早退和經常自動OT，但，這本來是工作的「份內事」，沒有好值得炫耀的，牛耕田夠勤力和準時了，但公司不是請隻「牛」，是請個「人」回來開工嘛．．．．

我衰，係衰係「成本效益「和「質素方面」的穩定性上。有時想挑戰難度，明明可以俾另一部門跟的CASE卻自己跟，拖慢自己進度；又有時和客人太過FRIENDLY，沒有一個PROFESSIONAL的談吐質素，作為一間大公司兼行iso，這個是必須改掉，老細於是一一強烈指出，這點我無話可說，我又係衰的，公司的遊戲規則如此，就應該跟足，即是給你成功挑戰難度，客人俾埋compliment，但你不達公司標準，公司都不會給你bonus人工。

仲要，這個道理，是我上幾日和一位新同事宵夜吹水時才醒悟，就好似動畫中有個燈泡突然著起一樣，是真的給人「點醒」的：「係喎，人地講一句多謝又如何？事後係乜都得不到，反正你搞唔掂只要『舉手』後面大把人跟，但你跟不上公司標準的話，你係無錢分兼蝕糧。」，唉，咁死得啦。

「客人覺得你服務好，買你服務，俾錢你洗你才有工開」，政治正確的「門面話」係人都識講，但實情是，中間還有兩個steps：客人買完你的服務後，公司收到錢，然後公司覺得你有contribution才把那些錢分到你的口袋中。客人點解買你公司的服務，有很多原因，良好的服務只算是其中重要的一環，你笑到「垃熟狗頭」咁，人地係唔買你就唔買你，但SERVICE得勁差呢？一樣有客到。

客人點解會買你服務，係高層和MARKETING個「腦」佢諗，作為「散仔」就做番「手腳」要做的事，跟足「腦」的ORDER做；唔跟的話，腦手唔協調，唔知點解「掟個蛋糕落隻腳到」，咁大家就等餓死了。那何謂「良好的服務」呢？有太多講法，我以前會想得很多，但現在會想得簡單和現實一點：公司指明要的，就是「良好的服務」，公司有錢賺而你又做到公司的「良好服務」，公司見到有contribution了，你咪收到「錢」，你咪WELL DONE GOOD BOY囉。

我花了整年時間現在才明白，係咪好蠢呢？我覺得係。當然你會話這種心態不要得，「客戶服務」唔係咁，但問題係，係公司直接俾錢你開飯，而唔係個客的時候，你唔跟咪你傻仔，係你唔識玩個遊戲。

苦水吐完了，那年尾review結果如何呢？

幸好，我自認真係俾個心出來做的，老細都見到，加上這兩個幾月有明顯改善，總算摸到遊戲規則了，於是賺到個ABOVE AVERAGE回來，即是說，俾心機的話，今年有機會的，總知真係險個剃頭啦！