淫照風波之政治不正確

淫照風波越演越烈，連中國大陸大雪災這單國際大新聞也壓了下來，實在始料不及．．．．不，如果在香港，淫照一定應該吸引力大。

至於淫照是否合成照，各位有對雪亮的眼情，自然會去判斷。只是在我看來，合成照的機會相當低，photoshop這樣強大都好，要key別人的人頭是一件高難度的動作，只是表現那種自然的表情和光暗位，只能用「神技」來形容；再來相中人的表情都從來未在報章雜誌，劇照出現過，竟然可以自己edit到出來，除了是「神」之外，我真的想不到可以有這種能耐。

不過本文重點不是在討論淫照是否真偽。

以下本文極度政治不正確，進入時請三思

其中一點想講，是警方高調執法。據不少網上大blog說，是因為受害女星隸屬於某大集團，於是警方捉到懷疑源頭，區區幾張相，便年到唔比人過唔俾保釋，甚至講到藏有那批相都可能付上刑事責任等，哇！咁大鑊，係人都驚啦。

我咁看，有錢佬叫差佬做事一定比窮人做事快的了，但某程度上是認同警方的做法，看事件發展，反映了警方還未找到門路處理這種新類型罪案，之前十三Ｋ T SHIRT如是，今次扣留懷疑上載淫照亦如是，十三Ｋ T SHIRT好一點，因為是間有名有姓的機構，要拉人容易，做完這場「大戲」後，起碼四至五年內，都無乜公司或者鋪頭會敢踩界。

但今次上載淫照便要不準保釋比上次更嚴苛，而且很快叫國際刑警幫手，我感覺上是第一，似乎是想俾個清晰的表態給公眾：「咪亂來，捉親都監禁你幾日，錢又要賠，監又要坐」，來防止有人「試圖犯罪」，因為捉實體的人又話易，但捉個可能用了PROXY的IP，用PROXY是低科技但卻要用「高科技」才捉到人就一點都唔易，香港警方在這方面經驗絕對不夠，為了在面對大範圍淫照上載的可能性，警方會用嚴刑，甚至出埋「口術」是可以預期，即是要背上警權過大的惡名，也要一試。

第二以快速叫國際刑警幫手，暗示了香港警方在新科技罪案前面，經驗不足而要叫幫忙，之前捉到個有百幾張相的，都只能聲稱「可能源頭」，因為你知啦，數碼相，要備份有幾難？如果真係捉唔到個「真犯」，而個犯繼續出淫照，好似現在咁，看到嚴刑都唔驚，仲要公然挑戰警方，此風一長，到時會出現什麼奇局呢？我真的估唔到了。

而另一單，是有網民指陳冠希那段所謂道歉聲明不盡不實，責難他為何不回港協助調查。我又咁睇，既然女星們的經理人們，演藝人協會，甚至各大報章，都大大聲異口同聲說那些是移花接木的「合成照片」，稍有電腦常識都知係「假」咁話，有「常識」的，都知係「假」啦，咁即係「陳冠希」都係受害者啦？大佬都講係假了，做細的又點敢認，無做又要道什麼歉呢？雖然那批相是真是假各位心裏有數。

還有，冷靜下來想，阿陳生老實招認後，事情會怎樣發展呢？

陳生，我對佢真係唔多有好感，但今次你話我偏幫陳生都好，其實講了真話對事情一點幫助也沒有，但會立時摧毀了那些女星們的大好前途，以後唔洗有運「吊」到張長期飯票，亦都話俾人聽，她們的經理人和公司在講大話，即時名譽掃地，他們做娛樂事業，賣名的，咁即是唔洗做生意了？諗來諗去，都係支吾以對着好。係，效果係好差，不過有些時候，支吾以對等時間沖淡了反而傷害是最低的。

另外不回港協助調查亦係無辦法中的辦法，同情地了解，如果佢認相片係佢影又話一定要回來，計下影了幾多幅，但現在係「疑似」，係「假」呀嘛，回來即是默認，那答什麼呢？回來又幫唔到手，仲要俾狗仔隊問同一條問題，分分鐘唔小心口多答錯野仲大鑊，佢有這樣的前科，你話我做縮頭烏龜好，話我係陳健康再版都好：講多只會錯多，為了免除更多人受傷害，係男人的，「陳健康再版」這個惡名必須要自己頂架啦，鬼叫影得咁happy呀啦～

這給了我們一個教訓：做事前要想清楚，否則搞出事，「硬食」註定會傷身的。

還有，如果那些相是真的，本來影的就是私人相，男朋友影女朋友的豔照，自己兩個人重看有什麼問題？問什麼公眾知情權事？

如果男朋友派俾人兼唱衰，就真的「人渣」得過份，但現在係有條唔知乜人，好像發現新大陸咁，但又未經人地同意便四圍公諸「人地的東西」給同好，咁，你又覺唔覺得發放條友才有問題呢？仲好意思捧佢為奇拿，我呸！門都沒有，奇拿係唔係好人我唔敢講，但他前期是有理想，起碼是想改變世界而做殺人這擋事，而那班女主角是不是正人君子我不理，但那班女主角得罪了閣下什麼，要把人家最私處的地方發放出來？人家好歹是個女生，不是婊子，你叫人以後點見人呢？奇拿就無你份了，瞥伯就有你份。

老老實實，發放者有問題，但我覺得那些捧發放者為奇拿的人，然後大呼叫囂的更有問題。人地偷窺影埋相俾你睇然後在後面叫好，這是甚麼心態？唉，不過現在很多網民都樂在其中，做奇拿擁戴者，其實是我有問題嗎？

Tweet