糟糕的近況

上個星期非常忙，無論公私方面，遲了更新請見諒。

家中的老頭子之前有點小病，動了手術，剛好在前天出院回到家中。現在行得走得，食得訓得，鬧得仲串得！還有閒情暸女護士，我諗應該叫無事啩？

住了醫院七日，我和老媽就每日來回醫院探病三次，返工，食飯時間，放工都去。幸好，由屋企行到醫院，再由醫院行到公司都係同一條路，急步行，路程要半小時左右，否則只是交通一項都會搞到一頭煙。

我探完病就行路返工，未算辛苦，不過時間好趕。但我老媽就辛苦好多，有時醫院打來就要通宵，佢又行得慢，來回醫院時間要多好多，辛苦過返工。

現在老頭子出院了，總算放下心頭大石，希望老頭子快點好返吧．．．

同時間，家中用了兩年幾的冷氣機「打了柴」，壞了兩個星期，忍了兩個星期每日房間三十幾度的高溫後，終於決定買過新的。破了財以為無事啦，點知同我送貨甩底！話要等多一個星期，我已經要特登請假等佢裝機，因為位置問題，我要拆床，預備好才裝到嘛．．．．OTL。

平時我都俾客轟得多，今次到我發老四，要特登打電話鬧爆佢，先至可以只遲一日去裝機。

至於公事就唔好提啦，日日都係忙。探病，執屋，公事，三樣一齊來．．．樣樣都要時間和勞力，現在搞到個人好攰，我現在最需要休息！

不過糟糕的，唔止上述．．．唉，好鬼煩。套用公司同事名言，「我唔知自已想點，但我知道自己唔想點」．．都係得個等字．．灰。