派case

客户寄来的email ，若果有能够做成生意的，通常会有其他部门分发给我们，然后，很多时都会由我，再分发给同事仔去促成生意。

平时通常派俾新人，因为佢地唔识揾客。但最近个市真系越来越难做， 于是开始多派给一些比较资深同事。佢地有时会出口要求，但有一些，开口问却又收唔到，但见到人收到case时又变到大数时，会口出怨言，俾说话我听，怨「点解俾佢唔俾我？」

遇着这个情况，通常都系讲「你都到数啦」，或者要「跟team派呀」，或「我点知会变大客，系那位同事劲之嘛」之类，当然以上都是实情，不过，个cases点解会咁俾，俾边个，其实个数只得我知，无人管到。咁我点解咁派呢？不瞒你，我真系睇人去派，系要我觉得你「得」才会派。

你可以话我衰，话我偏心，我会认，我最多只会有丁点儿唔开心。不过咁，唔开心我仍然会选做衰人。

我派左case咁耐，其实每派一单，我自己亦有keep record，唔系派左就算。

派case之前，我对同事们的能力已经略知一二，就著同事们的能力作出分流，避免由个唔得的去做。点样为之得呢？其实不外乎，从同事们问我问题的方法，点样描述个问题，问什么问题多，之后会俾甚么answer之类，再加上平时的performance，然后去估你善长乜，唔识乜，之后才派case。

不过唔止咁简单。

派完俾佢啦，除非是大case，否则我唔会主动去追，但，我自己会偷偷地返check个同事系咪真系有跟，点俾offer，然后同个客deal成点，我会等，等系我唔洗追的情况下，几时会肯主动report俾我听。

咁仍然无解答有些人经常有case收，有些无㖞？

如果我俾亲你都有好消息返，仲要有交带，我当然放心俾你做，下次都预埋你。相反有些同事能力是可以胜任的，就衰系无责任感，无持久力，嫌三嫌四。口未必有讲，但暗地里嫌case细唔跟求其close左了事，连向我交差都懒。对这些人嘛，细case都跟成旧「鸡」咁，大CASE我点知你会跟成点？又我点知你点分case大细呀？我当大case，你当佢细case做，分分钟变成missing  follow up，要我跟埋，咪揾着我来搞？咪啦，小事不忠大事不用，我先至唔会制造只镬俾自己，然后搞到自己呀！

这些准则，我系无同班同事讲，因为，这是职场的常识，做人的基本原则，应该系要「主动」学，唔应该由我来教，你唔识大把人可以replace。

但换著是朋友就有必要讲。怨上面无俾机会你，觉得自己怀材不遇的同时，其实有无抚心自问，自己对上面交带落唻的工作，一路以来，不论大小，有尽心尽力跟足过？！你不用答我，但收得人钱，数完银纸，就要乖乖地坐返埋位尽力做，这是职业操守，收左唔做，你唔系咁衰仔下话？！

上司系人，佢点会傻到俾一个大task，俾平时跟得可能唔系太好的同事去做？万一真系出事，上头问起来点解咁俾，你点解释？答「我觉得呀」唔通？然后搞到要自己孭镬收场？

系，系我知你回复水准系好劲，但佢鬼知你回复水准时有几劲咩！我同你做咁多年老友都未知啦！一个平常人，赏识别人前都系看前科，唔看经验的，那叫做「豪赌」，但有数据唔看，无啦啦又赌乜鬼野啫！唔会老衬成咁下话？更重要系，点解又要我赌系你身上呢？而唔系赌系隔离位，后生，兼样靓身裁正，个样有少少似周秀娜，又肯博的高材生身上？所以唔该醒下啦老友。

Tweet