從鋼之錬金術士結局看如何戰勝真理

鋼之鍊金術士漫畫和新一季動畫都已經完結，現在才講實在out到無朋友，無錯，我認的。

至於是水島精二版還是漫畫版的結局較為精彩，我其實會咁諗，水島版較為似現實，好重中年大叔那種灰灰地，充滿悲情的無奈味道，而荒川的漫畫版，就是正宗少年漫畫，理想化但令人感覺溫暖好多。兩個都完得好看，但就好難講邊個好邊個唔好，但講到鍾意，似乎是水島版較合我現在的口味，夠佬味。

扯遠了，講返漫畫版。其實一出我即刻看完，遲遲唔寫，係我諗唔通點解愛德華放棄「真理」之門會解釋為戰勝「真理」？　而「真理」當中指的又係乜呢？　唔知，咁我就唔明點解會話佢戰勝真理？　這個字我思前想後，左諗右諗都諗唔到結果，唔明當然唔寫啦！　咁現在又寫，係咪我諗到乜野係「真理」呢？

其實唔係，只係我發覺原來係我的諗法「先後」有問題。

先不要諗漫畫中指的「真理」係乜野，而係應該問，點解愛德華係漫畫中要得到「真理」？

「真理」係乜野組成其實我唔多清楚，但「真理」之門係漫畫中就係鍊金術的根源，有「真理」通過才可以鍊成，知得越多既人越「超人」。故事原先係愛德華兄弟想透過鍊金術去鍊成死去的母親，鍊成失敗後，途中發生了種種大家都看到的事情，尋找賢者之石無非是希望將鍊金術的能力極大化,  但最終目的，還是希望尋回艾爾被奪走的身體，而艾爾本人就希望尋回愛德華的手和腳而發展下去。

破壞真理之門，斷絕自己繼續接觸「真理」，就等同廢掉了鍊金術師的生命，由超人變回正常人，這個選擇, 一般人唔會咁諗，偏偏愛德華會。 鍊金術是否好重要？的確係好重要，但鍊金術不是愛德華人生的全部，能夠使用鍊金術只是達成目的的其中一個「手段」，講到底奪回艾爾身體才是最終目的，而實際上沒有鍊金術的愛德華還是愛德華，佢一樣可以生活，只是他後續的生活, 就要落手落腳, 無咁方便吧。

再簡單講, 愛德華放棄鍊金術在他而言, 只是GIVE UP了一個可能性，的確可能係一個最不坦道, 係渴求力量的人心目中, 最蠢的決定，可惜這個決定並不等同毀掉他，外人覺得這個選擇差但唔等同他已放棄，尋回艾爾的身體，是他一生最終目標，用一個「可能性」達成最終目標，其實還是相當「化算」。

由「真理」到人體鍊成，講到底都只是手段，尋回身體，救回死人先至係最終目的，愛德華通通沒有忘記，放棄超人的鍊金術，唔留戀下去，正正是他沒有被「真理」的超人性所迷惑，上次那種半吊子方法，右手僅僅換回艾爾的靈魂，但今次，他放棄是鍊金術師的全部，用被認為最好的可能性換回來，是真正的戰勝了「真理」，成功換回艾爾整個人。

人原先想改善家人生活而努力搵錢，錢搵得越多，就忘記了為乜去搵錢，最後甚至連生活都毀掉而成為真正的錢奴。因手段而忘了目的，在我看來這是十分諷刺又可惜，不過真正得到解脫的又有幾多人呢？

真理究竟是代表一，是全，是世界，宇宙或是神，還是普世價值又是否重要呢？我不太懂得，不過我慢慢明白，搞清乜野原因想要擁有「真理」，當得到「真理」之後要如何處理，這才是我真正要學習和思考的課題。