IPHONE改變生活

自從變成了IPHONE3GS, IPHONE4用家後，生活習慣的確起了不少變化。
多得Iphone在上網和眾多app的方便，返工，放工，食飯，小休，等人，只要有一絲片刻的空閒時間，便會拿部手機上下網，看新聞，看twitter，打下機，總之無時得閒。

使用Iphone，或者說是使用smartphone時間越來越長, 越久而不自知，不知不覺養成了倚賴的習慣，是好是壞？有時真的搞不清楚。

問下自己，點解會用咁多？

遊戲機我打得唔多，因為個MON細；上網都唔算多，最多上openrice check下邊間好食，反而通訊軟件，如上twitter，上微博，上facebook希望得第一手資訊就最多。

但諗深一層，第一手資訊是否對自己如此重要？其實又未必，又唔係我女友，你幾時食飯拉屎，返工放工其實我無乜興趣知，同理，假設自己的「新聞報道」有人想知，是否顯得太傻太天真，又帶點自戀了？

除了港聞和國際新聞，科技打機消息等消閒東西，其實回家再看都未遲，有什麼需要真係第一時間要知呢？

當然有老友覺得是必需的，但係在我情況，自問「轉數」唔夠快，我更需要在吸收資訊之後，有可以用來「分析」和「吸收」的時間和空閒，俾時間我亂諗野，消化左，才知道剛剛知左D乜，若果不斷有資料入，我未得閒看，只會為新來的資料分類而疲於奔命，何必呢？

做人還是回歸簡單一點，俾多點空閒時間給自己，放低部手機，第一手消息對我來講唔係必需的話，知慢一點，係唔會死人既。